Белгілі ғалым, көрнекті қоғам қайраткері Мырзатай Жолдасбековтың Егемен Қазақстан газетінің 24 тамыз күнгі санында "Дін - ұстай алсаң қасиетің, ұстай алмасаң қасіретің" тақырыбында ой-толғамы берілген. "Біз опық жесек, алауыздықтан опық жеген халық­пыз. Мұны біз тарихтан жақсы білеміз. Сон­дық­тан да, ең алды­мен, бізге керегі – ағайын­ның ынтымақ-бірлігі. Онсыз тарих көшіне ілесе алмай қаламыз" деп бастаған ағамыз елдегі ынтымақ пен бірлікті сақтау, нығайту мәселесіне көп тоқталды. айналамызда торуылдап жүрген ағымдардың ықпалынан жастарымызды қорғау жайы сөз болды. "Қайда барсаң да уағыз айтатындардың өлім туралы зарлап жатқанын көресің. Түбінде өлетінін әркім-ақ біледі ғой, соншама елге үрей тудырудың керегі не? Сонда біз жас ұрпақты «сен өлесің» деп тәрбиелеуіміз керек пе? Бақытты, мағыналы өмір сүр, еліңнің айтулы азаматы бол, жақсы кісі бол деуіміз керек емес пе? Ес кіре бастағанынан балаға «өлесің» деп отырсақ, оған өмірдің не керегі бар? Ақыры өледі екенмін ғой деп ол бала ажалынан бұрын пәлеге ұшырауы мүмкін. Осы күндері әкелі-балалы екеуі отырып бір үйде, бір дастарқаннан дәм татпайтындар да шығып жатқан көрінеді. Дін әке мен баланы өйтіп бөлмесе керек еді. Көп­теген отбасы дін­нен зар илеп, запыран құсып отыр. Ис­ламның жолы бұл емес еді ғой. Осының бәрін екшеп ақылға салмай болмайды. Пайғамбарымыздың өзі де бір хадисінде: «Дінге шектен тыс беріл­меңдер» деген екен ғой. Қасиетті Пайғам­бары­мыздың ақылына ден қояйық. Абай болайық, ағайын!
      «Дін – ғылымның анасы, Дін – ғылымның әкесі, Ғылым – діннің баласы, Дін – ғылымның көкесі» дейді ақиық ақынымыз Мұқағали. Исламды біздің халық баяғыдан-ақ бағалаған. Шынында, кейде саясаттың адас­тыр­ғаны болмаса, Ислам дінін жоғары бағала­ған жұртпыз. Біз кеше түгел ислам дінін ұста­ған заманды көрдік. Бес уақыт намазын, 30 күн оразасын қаза қылмаған аталарымызды, әке­ле­рімізді, әжелерімізді білеміз. Дін бізге бір күнде келіп, бірден дари қойған жоқ. Ислам қазақ шығарған дін емес. Ислам Отанды сүюге, туған халқын қадір­леу­ге, ата салтын әспеттеуге, ата-анасын сый­лау­ға, ардақтауға үндейді. Осы жолдан айнуға болмайды.

      Ислам – ең соңғы, таза дін. Өзге діннің бар қасиетін бойына сіңірген дін екенін өмір дә­лелдеді. Бұл дін – бірліктің діні. Осы бірліктің дінін біз де әспеттеуіміз керек. Оны елдің бірлігіне жаратып, ала-құлалықтан арылуымыз қажет. Ол үшін дінді терең түсінуге тиістіміз. Дін деген не? Ғылым. Наным. Мәдениет. Оны халықтың ғасырлар бойы қалыптасқан дәстүрі­нен, білім-білігінен, ой-санасынан, мәдениеті­нен, ғылымынан бөліп қарауға болмайды. Исламды насихаттап жүрген кейбір азаматтар осы жағына мән берсе екен деймін. Өзгенің ықпалына емес, өзіміздің ұлттық үлгімізге жүгінгеніміз жөн" деп ой толғайды.
        Бұл мақалада оқырманға қазақ халқына діннің келуі, ата-бабамыздың қабылдауы мен қадірлеуі, уағыз насихаттың мән-мағынасы, дін мен дәстүрдің арасы ажыратылып түсінікті қарапайым тілде көрсетілді.

Толық мақаланы төмендегі дерек көзінен оқи аласыз.